انا لابد في المحطة

باكتبلك
إسمعيني
ياللي كنتِ نني عيني
لو لســـًّــاكِ في مكان
مستنياني
باقوللك انا
فاتني زماني
يظهر إني
مش راجع تاني
مش راجع نفس
إللي ف يوم عرفتيه
اتحولت
حاربت عشان مكونش أناني
وبقى للحب عندي
اكتر من حبة معاني
واكتر من فرحة وشوش
..
باقوللك
والشوق كاويني
بس لازم تسمعيني
صحيح في الوحدة
احتياج
وطلعان عيني
بس الواجب عليَّ
-وإخص هنا ع الواجب -
إني أقوللك
إمشي وسيبيني
قطرك هيعدي
كمان ثواني
وأنا قطري
على قشر بيض هيجيني
ياللا امشي
تذكرتك يمكن تبوظ
وماتنفعش تاني
وانا مأجَّر هنا دكة
يا فرحتي لو فاتك قطرك
فين هتنامي
وف المحطة وحوش
..
باكتبلك بصي
اسمعيني
خدي القطر من عندك
وانا هأخده من هنا
يمكن تقابليني أذا ركبتيه
و أنا يمكن
ماركبهوش
!!!