Friday, October 07, 2005

كل شىء

..
وكل شىء بينسرق مني
العمر م الأيام
والضي م النني
وكل شىء كل شىء
حواليا يندهلي
جوايا باندهلك
يا ترى بتسمعني
..
فينك؟؟
..
فينك ياللي طلعت عيني
عليك تدوير
وانا رجليا ما عاد فيها حيل
من كتر المشاوير
فينك ليه معاند حظي
فين ألاقيك
وانت ف يوم هاتيجي واللا
لازم أنا أجيك
السكة بعيدة
والوحدة شديدة
وبرد الليل ف الصحراء مرير
وبرد الليل ف الصحراء مرير
..
فيه ديب مر عليا و كان حزين
وكمان جمل وجمّال
مليانة عينه شجون
ولما يطلع عليا القمر
ومش باشوفك زى العادة
بالاقي السؤال يهاجمني في السكون
إنت مين ؟
إنت مين؟
..
فينك؟؟
بيني وبينك
أكتر م الذكريات
..
إنت مين؟
..
أنا من غيرك
أنا مش عاقل ولا مجنون
أنا مطحووووون
و ما عاد فيّ غيرك
وما كان ليّ غيرك
يا ريتني بس
كنت بقيت مجنون
..
الدنيا رحايا
والدمع ساقية كبت
إنت رحت
و أنا - الظاهر - مت
والفاضل مني مش عارف
أنا مين
!

1 Comments:

At 5:32 AM, Blogger African Doctor said...

رائع يا توني
مرحباً بعودتك للتدوين

 

Post a Comment

<< Home