أن أعيش ضد ارادتي..

..

اتعلمت اكتـِّم

كل المشاعر والاحلام

واتكتـِّم عليك

لو جِتني يوم في المنام

علمني الحبس إن الحب رفاهية

والحلم محض اوهام

وبكرة يمكن مايجيش

ولو جه يبقى حرام

علمني كَرشة النَفَس

وطعم البُكَى في الحَمّام

..

بس المهم والأهم

لما تتعلم

انك تكتّم

انك تبلــّم

انك  صنم

..

الحبس بيعرفك ازاي تعيش

ضد ارادتك

وإن أقصى طموحك

تفضي مثانتك

وإزاي تتمني كل لحظة

تبقى نهايتك

..

ماهو لما تكتم جواك الأمل

وتصيب  نفسك بنفسك بالشلل

يبقى  حرام فيك الكلام

ويبقى على الدنيا السلام

..
فمن فضلك لما تبقى تزورني
ما تتكلم
بس شوفني وبلـّم
ويمكن يكون احسن كمان
تمشى من غير ما تسلم
..