Thursday, December 01, 2005

يا بيتي

لأني بعيد
بعتت الروح حواليكي
لأني بعيد
وقادر ربي يحميكي
..
لأني مش قادر أقرب
مش قادر أضمك
وانا متغرب
مسافات ياما بيني وبينك
القلب عمال يدبدب
عايزك ومش راضي يتعب
عايزك والحزن حابسه
ومالوش مهرب
..
أصل الحزن فكرة
مش مشاعر
خمرة تسكر
حبل يربط
ساقية تدوخ
وهـمّ سافر
..
وانا أعمل إيه
وماهوبيدي
السكة طويلة
وانا ماشي لوحدي
احلم لوحدي
واحاول لوحدي
ونفسي اجيلك
اجيلك
اجيلك
ولو ليوم
ولولساعة
الدمع متحاش ف الغيوم
والصدفة مش راضية تحصل
والحلم مش راضي ينام
ولا الأمل راضي يبطل
..
طب بس اشوفك
بس اشوفك
من غير ما إنت تشوفيني
انا راضي لو ده ينفع
انا بعيد وباتقطع
ايدي فاكره لمستك
وبس الذكري بتمتـّع
وبتطلع م القلب كل اللي إتترّب
واتغرب
عنك و بعّـده الحزن
والمسافات
..
ولأني بعيد
بعتت الروح حواليكي
وانا وحدي هنا بابكيكي
يا مصر
يا بيتي
..

4 Comments:

At 1:59 PM, Anonymous Anonymous said...

يا مصر يا بيتي.. ????
ايدي فاكره لمستك ????

Masr bardo ????

Fady W

 
At 6:34 AM, Blogger toni! said...

نفسي أجيلك
أجيلك
أجيلك
وأمللي عيني من سحر نيلك
أتدفى فيكي
واتحامى فيكي
وأغني للي سهران ف ليلك
..

كده بقت مصر يا عم فادي؟
وهو لو فيه حد تاني مانا كنت غرقتكو أشعار ;)

 
At 9:00 AM, Blogger African Doctor said...

الحزن فكرة مش مشاعر؟؟
استغربت من هذه الجملة

جميلة قوي يا توني

 
At 8:42 AM, Anonymous Anonymous said...

hayla ya Toni...3agbny awi el e7sas el morhaf.
twinkle

 

Post a Comment

<< Home