ع السطوح ومبلم

وانا قاعد قبل الفجر

ما يطلع

مبلّم مسهّم

والندى بالل نضارتي

بارسم

في الهوا تضحكلي خسارتي

ودراعي مرمية جنبي

وع السطوح اللي جنبي

جارتي

قال بتنشر قبل الفجر

عملت مش فاهم

وركزت ف حيرتي

البت حلوة

ف عين ناس كتيرة

وانا ما ف عيني

نظر يافندم

انا لسه مبلم

أمي صوتها ف ودني

بتقوللي : ومالها

أسرح وأقول انا كمان : ومالها

كل اللي بارسمه بصباعي

بياخده الهوا معاه

ويفضللي بس الصباع

وكلام أمي وصداع

وجارتي بتنشر لسه

وهي مكسوفة

بقالها ساعة إللا ربع

مكسوفة

وانا باصص قدامي وتايه

والندي بيلمع على أورتي

ويبل قميصها الوردي

حاجات كتير مكشوفة

وانا مش شايف حاجة

مش شايف يا ناس براحتي

وكل شوية تغني

أغاني مش وقتها

نفسي أقوم أقوللها تسيبني

ع اللي جرى

يعلى صوتها ف الهوا

والسطح مش ملك ابويا

والهوا بتاع ربنا

والغنى يشتتني

وانا اصلا متنيل

متششت خلقة ومتكيل

مش عارف الم درفي على حزني

كل ما اركز اتفشكل

القلة بعيدة وناحيتها

انشالله ما عني شربت

انشالله ما عني سهرت

انشالله ما عني عشقت

مش عارف حتى اتضايق

ع اللى جرى

بتغني الهانم وتتعايق

لسه جوايا العيشة رخمة

مش عارف افوق من يوم الصدمة

بس اما تيجي وانا احكيلك

كان نفسي الحق احكيلك

غيري الأغنية بأه يستر عرضك

جيبتيني لورى

وامسح دموعي ف منديلك

ع اللي جرى

..

وادينا ف ده الحال

من تلات اشهر

لا انا بافوق

ولا هي بتبطل تنشر

ولا امي بتهدا

ولا الفجر بيظهر

..

امتى الفجر يشقشق بأه

حيطان الواحد متشققة

والزن حرام بجد حرام

مابقتش حمل التريقة