حدّ يطمنني
صحيت مفزوع
جالي حلم..والعياذ بالله من ده حلم
شفت مصر صبية ملفوفة بالسواد
والسواد في الحلم لون الخلفية الهباب
يعني مصر ماكنتش لابسة
عريانة ولاففها الضباب
مكسورة مكسوفة وقلبها منكاد
!
شفت الناس ف الشوارع بقت أبيض ف اسود
زي بلاد الخليج
و الأوبرا محروقة والساقية اتهدت
ووسط البلد محبوسين مع عمر خيرت
و الجرايد كلها مصفر أو مخضر
والشوارع زي افغانستان فيها موت
والستات ستات بس جوه البيوت
وبراها شجر
!
النيل كان نايم ف نفس المكان
بس مداس غلى راسه بالجزمة
كل تماثيله مرمية فيه
م المتحف جابوهم وقالوا حرام
والأوتلات هياكل سودا
كانت بتدخن لسه من يومين
واصحاب الرأي هربوا منها
و برّه بيقولوا مصريين
!
واحد م الغربة قاللي
شايف الصبية اللي جاية علينا
ومش لابسة غير جلدها
وكل الناس أهم بتنهش لحمها
مش عارف ليه انا عارف شكلها
قلتله وانا باصص ف الأرض
دي أمي..ياريتني ما سبتها
:(((
نزلت الشوارع والناس خضيتني
عميان وعينهم بيضا ما فيها نني
صحيت مفزوع وقلت
ياااااااااا رب حدّ يطمنني
